ОСК: Құрылтай сайлауына 7 партиядан 546 кандидат ұсынылды
Орталық сайлау комиссиясы Құрылтай депутаттығына кандидаттарды ұсыну кезеңінің қорытындысын шығарды, деп хабарлайды Adaladam.kz.
ОСК хатшысы Шавхат Өтемісовтің айтуынша, кандидаттарды ұсыну 2026 жылғы 13 шілде сағат 18:00-де аяқталған.
«2026 жылғы 13 шілде сағат 18:00-дегі жағдай бойынша Орталық сайлау комиссиясына 7 саяси партияның партиялық тізімдері ұсынылды: Қазақстанның «Ақ жол» демократиялық партиясы» қоғамдық бірлестігі – 63 кандидат, «Ауыл» партиясы» республикалық қоғамдық бірлестігі – 69 кандидат, «Әділет» саяси партиясы» қоғамдық бірлестігі – 186 кандидат, Қазақстанның «Байтақ» жасылдар партиясы» қоғамдық бірлестігі – 47 кандидат, «Қазақстан халық партиясы» қоғамдық бірлестігі – 72 кандидат, «Жалпыұлттық социал-демократиялық партия» республикалық қоғамдық бірлестігі – 33 кандидат, «Respublica» партиясы» қоғамдық бірлестігі – 76 кандидат», – деді Шавхат Өтемісов.
ОСК хатшысы қазіргі уақытта барлық саяси партиялардың құжаттары уәкілетті мемлекеттік органдарға жолданғанын айтты.
«Қазіргі уақытта барлық саяси партиялардың құжаттары партиялық тізімге енгізілген азаматтардың Конституцияның 35-бабының 3-тармағында, 54-бабының 3-тармағында және Конституциялық заңның 4-бабында белгіленген талаптарға сәйкестігін тексеру үшін тиісті уәкілетті мемлекеттік органдарға жолданды. Саяси партиялар ұсынған партиялық тізімдерді тіркеу 2026 жылғы 23 шілдеде сағат 18:00-де аяқталады», – деп түйіндеді Шавхат Өтемісов.
