Наурызнама онкүндігі: Ұлттық киім мен спорт арқылы мәдени құндылықтарды дәріптеу
Қазақстанда Наурыз мейрамы аясында жалпыұлттық Наурызнама онкүндігі өткізіліп жатыр. Мерекелік онкүндіктің әр күні белгілі тақырыпқа арналса, 18 және 20 наурыз айрықша мәнге ие күндер ретінде ерекшеленеді, деп хабарлайды Adaladam.kz.
18 наурыз – Ұлттық киім күні
Бұл күні ұлттық киім мәдениетіміздің ажырамас бөлігі ретінде дәріптеледі. Қазақстан Республикасының Ұлттық орталық музейінде «Ұлттық киім – ұлт мәдениетінің жарқын көрінісі» атты көрме, Әбілхан Қастеев атындағы Мемлекеттік өнер музейінде этнодизайнерлік сән көрсетілімі, сондай-ақ қалалық мәдени ұйымдарда челлендждер мен флешмобтар ұйымдастырылды. Мақсат – ұлттық киімнің тарихи және заманауи үлгілерін көрсету арқылы халыққа эстетикалық талғам мен мәдениетке деген құрмет сезімін ояту.
20 наурыз – Ұлттық спорт күні
Ұлттық спорт күні ел ішінде дәстүрлі спорт түрлерін дәріптеуге арналған. «Ұлы дала ойындары: тарих пен дәстүр» көрмесі, мектеп оқушылары арасындағы «Ұлттық ойын – ұлт қазынасы» турнирлері, сондай-ақ аударыспақ, қыз қуу, бәйге және тоғызқұмалақ сияқты жарыстар ұйымдастырылды. Бұл күн ұлттық спорт пен дәстүрді жас ұрпаққа насихаттау, халықтың тарихи мұрасын жаңғырту және салауатты өмір салтын дәріптеуге бағытталған.
Осылайша, Наурызнама онкүндігі ұлттық киім мен спорт арқылы мәдениетіміздің бай мұрасын сақтап, қоғамда бірлік, сыйластық пен дәстүрге деген құрметті нығайта түсетін маңызды мерекелік кезең болып отыр.
